ASKARI POLISI FEKI WA USALAMA BARABARANI ALIYEKUWA ANATAPELI WANANCHI AKAMATWA JIJINI DAR ES SALAAM

Kamanda wa polisi kanda maalum Suleiman Kova akimuonyesha polisi feki wa usalama barabarani [kushoto] aliyevaa sare za polisi barabarani [traffic]

            Jeshi la Polisi Kanda ya Dar es Salaam linamshikilia na kumhoji mtu mmoja aitwaye ROBSON S/O SEIF MWAKYUSA EMMANUEL, miaka 30, Mkazi wa Kijitonyama jijini Dar es Salaam kwa tuhuma za kujifanya afisa wa Polisi kikosi cha Usalama barabarani akiendelea na kazi za ukaguzi wa makosa ya usalama barabarani

 Mtuhumiwa huyu alikamatwa tarehe 02/08/2014 huko Kata ya Chamazi, Mbagala Majimatitu Mkoa wa Kipolisi Temeke akiwa amevalia sare za Polisi na cheo cha Stesheni Sajenti.

Baada ya kukamatwa alikutwa na gari namba T723 BAK T/Cresta rangi nyeupe analilotumia kuzunguka maeneo mbalimbali ya jiji kutapeli watu akiwadanganya yeye ni askari polisi. Gari hilo lilipopekuliwa lilikutwa na....................

·         Radio Call 1yenye namba GP380 aina ya Motorola

·         Leseni za udereva zipatazo 40 za watu mbalimbali

·         Stakabadhi 02 za Serikali zenye nambari A0531562 na A1672464

·         Police Loss Report mbalimbali.

·         Nakala 03 za Notification zilizojazwa.

·         Kofia moja ya (Uhuru Cape) ya Usalama barabarani,

·         Beji 01 yenye jina la E.R. MWAKYUSA ya kuweka kifuani.

·         Ratiba ya mabasi yaendayo Mikoani ya SUMATRA

Pia mtuhumiwa alipekuliwa nyumbani kwake alikutwa na vitu vifuatavyo:

·         Pea 04 za sare ya Polisi ya KAKI.

·         Pea 03 za sare ya Polisi ya Usalama Barabarani

·         Koti 01 ya mvua ya Usalama Barabarani

·         Reflector 08 za Usalama Barabarani

·         Kofia 01 (Uhuru Cape) ya Usalama Barabarani

·         Kofia 02 (Barret) nyeusi za Polisi

·         Mikanda 02 ya Bendera mali ya Jeshi la Polisi

·         Mikanda 02 ya Polisi (Tunic Cross Belt) mweusi.

·         Mikanda 02 ya Filimbi.

·         Cheo 01 cha Sajenti

·         Vyeo 03 vya Stesheni Sajenti.

·         Vifungi 08 vya chuma mali ya Jeshi la Polisi.

·         Cheo 01 cha Stesheni Sajenti cha JWTZ

·         Notification Form zilizojazwa zipatazo 62.

·         PF3 Forms zipatazo 04

·         Notification Forms ambazo hazijajazwa zipatazo 08

Mtuhumiwa huyu aliwahi kuwa askari polisi aliyejiunga na Jeshi hilo Mwaka 2000 akiwa mwenye namba F2460 lakini alifukuzwa kazi kwa fedheha mnamo tarehe 21/03/2014 huko Kibaha Mkoani Pwani akiwa na cheo cha Stesheni Sajenti.

Uchunguzi wa awali unaonyesha kuwa mtuhumiwa huyu amekuwa akijitambulisha kuwa ni askari hivyo kufanikiwa kuwatapeli wananchi mbalimbali na kujipatia kiasi kikubwa fedha kwa njia za udanganyifu. Wananchi waliotapeliwa wanatakiwa kuja kutambua leseni zao ili sheria iweze kuchukua mkondo wake

            Katika hatua nyingine Jeshi la Polisi Kanda Maalum Dar es Salaam linawashikilia majambazi wawili kwa kutuhuma za kujihusisha na unyang’anyi wa kutumia silaha katika maeneo mbalimbali ya jiji la Dar es Salaam na mikoa ya jirani. 

Watuhumiwa hao walikamatwa tarehe 30/07/2014 huko Makumbusho Kijitonyama, kufuatia msako makali unaoendelea wa kuwasaka kisha kuwakamata watuhumiwa wa ujambazi wa kutumia silaha na makosa mengine.

Walipopekuliwa nyumbani kwao walikamatwa na Bastola mbili moja ni GROCK17 yenye namba B019259 iliyotengenezwa nchi ya Jamhuri ya CZECH ikiwa na risasi 13 ndani ya magazine. Nyingine ni Bastola aina ya CHINESE iliyofutwa namba zake ikiwa na risasi moja ndani ya magazine.

Watuhumiwa waliokamatwa ni hawa wafuato:

·         FREDY S/O STEVEN, Miaka 25, Mfanyabiashara, Mkazi wa Kiwalani.

·         IRENE D/O NYANGE, Miaka 36, Mfanyabiashara, Mkazi wa Kijitonyama, uchunguzi unakamilishwa na watuhumiwa watafikishwa mahakamani wakati wowote kuanzia sasa

Jeshi  hilo la Polisi Kanda Maalum DSM linamshikilia mlamavu aitwaye SAID S/O TINDWA, MIAKA 36, MKAZI WA VIJIBWENI  Wilaya ya Temeke  kwa kosa la kufanya biashara ya dawa za kulevya, taarifa za kiintelijensia zilizopatikana kupitia kwa raia wema ziliwafikia makachero wa Polisi kuwa mlemavu huyo ambaye mguu wake wa kulia ni wa bandia amekuwa akiutumia vibaya mguu huo kwa kuficha dawa za kulevya ambazo aliwauzia watumiaji. Aidha kila kete alikuwa akiuza kwa shilingi Tsh.1000.

Ilikuwa mnamo tarehe 01/08/2014 katika mtego maalumu uliowekwa na askari wa upelelezi ndipo mlemavu huyo alikamatwa akiuza dawa hizo kwa wateja wake baada ya kuzitoa alikozificha ambapo ni ndani ya mguu huo wa bandia. 

Uchunguzi wa awali unaonyesha kwamba mtuhumiwa huyo amekuwa akitumia mbinu hiyo kwa muda mrefu kabla ya kukamatwa. Aina ya dawa alizokuwa akiuza ni zile za viwandani kama vile Cocein , Heroin na wakati mwingine bhangi. Uchunguzi wa shauri hili bado unaendelea na jalada la kesi yake litapelekwa kwa mwanasheria wa serikali ili sheria iweze kuchukua mkondo wake.

Aidha natoa onyo kwa watu wenye ulemavu kwamba wasitumie kigezo cha ulemavu kufanya uhalifu kwa makusudi kwani wanawaharibia walemavu wengine ambao ni raia wema na ambao mara nyingi huonewa huruma na kutotiliwa mashaka.

 Halikadhalika Jeshi hilo  linawashikilia wanawake watatu kwa kosa la kujihusisha na mtandao haramu wa nyara za Serikali. Mnamo tarehe 23/07/2014 huko eneo la Mbagala Mission Polisi walipata taarifa kutoka kwa msiri kuwa eneo hilo lina watu wanajihusisha na biashara ya nyara za serikali. 

Polisi walifika eneo la tukio na kufanikiwa kumkamata WEMAEL D/O MSHANA na alipopekuliwa nyumbani kwake alikutwa na vipande sita vya meno ya tembo vyenye thamani ya dola za Kimarekani 30,000 (Dolla elfu thelathini)  sawa na shilingi za kitanzania 49,750,000/= (milioni arobaini na tisa mia saba hamsini elfu) ambao ni sawa na tembo wawili waliouawa.

Taarifa za awali zinaonyesha kuwa mtuhumiwa anashirikiana na watuhumiwa wengine ambao ni UPENDO D/O MSHANA, Miaka 33, na STELLA D/O DANIEL, Miaka 17, Mwanafunzi wa Chua cha Genessis cha Mtoni kwa Azizi Ali.

Uchunguzi zaidi unafanyika kwa kushirikiana na Idara ya wanyama pori ili kuhakikisha sheria inachukua mkondo wake.

S. H. KOVA

KAMISHNA WA POLISI KANDA MAALUM

DAR ES SALAAM